शालिनदि

पौष शुल्क पुर्णिमा देखि सुरु भएको श्री माधव नारायण र श्री स्वस्थानी ब्रताका लागि काठमाडौँ को साँखु स्थित शालीनदी मा इस्नान गर्नेहरुको भिड लाग्ने गर्दछ। एक महिनासम्म चल्ने स्वस्थानी ब्रत अवधिभर शाली नदीमा ब्रतालुहरुको घुइँचो लाग्ने गर्दछ । परापूर्वकालदेखि नै धार्मिक इतिहास बोकेको शालीनदीमा देशका कुना कुनाबाट मात्र नभई छिमेकी राष्ट्र भारतबाट समेत हिन्दु धर्मावलम्बीहरु स्नान गर्न आउने गर्दछन् ।

स्वस्थानी ब्रतकथामा उल्लेख भए अनुसार विवाहिता महिलाले एक महिनासम्म विधिपूर्वक स्वस्थानी माताको पूजा आराधाना गरे श्रीमानको आयु बढ्ने र अविवाहितले सुयोग्य वर पाउने धार्मिक विश्वास छ । एक महिनासम्म श्री स्वस्थानी व्रत कथा श्रवण गरे मात्रै पनि शुभ फल प्राप्त हुने विश्वास गरिन्छ ।

स्वस्थानी ब्रतकथासँग जोडिएको शालीनदीमा हरेक वर्ष एक महिनासम्म मेला लाग्दछ । पूर्वी काठमाडौको साँखुस्थित शाली नदीमा मेला भर्न किशोर, किशोरी, बालक, बृद्ध र सन्तमहन्तहरुको समेत भीड लाग्ने गरेको छ ।